Daya Shatakam

prapadye taṁ giriṁ prāyaḥ śrīnivāsānukampayā |
ikṣusārasravantyeva yanmūrtyā śarkarāyitam

प्रपद्ये तं गिरिं प्रायः श्रीनिवासानुकम्पया ।
इक्षुसारस्रवन्त्येव यन्मूर्त्या शर्करायितम्

vigāhe tīrthabahulāṁ śītalāṁ gurusantatim |
śrīnivāsadayāmbhodhiparīvāhaparamparām

विगाहे तीर्थबहुलां शीतलां गुरुसन्ततिम् ।
श्रीनिवासदयाम्भोधिपरीवाहपरम्पराम्

kr̥tinaḥ kamalāvāsakāruṇyaikāntino bhaje |
dhatte yatsūktirūpeṇa trivedī sarvayogyatām

कृतिनः कमलावासकारुण्यैकान्तिनो भजे ।
धत्ते यत्सूक्तिरूपेण त्रिवेदी सर्वयोग्यताम्

parāśaramukhānvande bhagīrathanaye sthitān |
kamalākāntakāruṇyagaṅgāplāvitamadvidhān

पराशरमुखान्वन्दे भगीरथनये स्थितान् ।
कमलाकान्तकारुण्यगङ्गाप्लावितमद्विधान्

aśeṣavighnaśamanamanīkeśvaramāśraye |
śrīmataḥ karuṇāmbhodhau śikṣāsrota ivotthitam

अशेषविघ्नशमनमनीकेश्वरमाश्रये ।
श्रीमतः करुणाम्भोधौ शिक्षास्रोत इवोत्थितम्

samastajananīṁ vande caitanyastanyadāyinīm |
śreyasīṁ śrīnivāsasya karuṇāmiva rūpiṇīm

समस्तजननीं वन्दे चैतन्यस्तन्यदायिनीम् ।
श्रेयसीं श्रीनिवासस्य करुणामिव रूपिणीम्

vande vr̥ṣagirīśasya mahiṣīṁ viśvadhāriṇīm |
tatkr̥pāpratighātānāṁ kṣamayā vāraṇaṁ yayā

वन्दे वृषगिरीशस्य महिषीं विश्वधारिणीम् ।
तत्कृपाप्रतिघातानां क्षमया वारणं यया

niśāmayatu māṁ nīlā yadbhogapaṭalairdhruvam |
bhāvitaṁ śrīnivāsasya bhaktadoṣeṣvadarśanam

निशामयतु मां नीला यद्भोगपटलैर्ध्रुवम् ।
भावितं श्रीनिवासस्य भक्तदोषेष्वदर्शनम्

kamapyanavadhiṁ vande karuṇāvaruṇālayam |
vr̥ṣaśailataṭasthānāṁ svayaṁ vyaktimupāgatam

कमप्यनवधिं वन्दे करुणावरुणालयम् ।
वृषशैलतटस्थानां स्वयं व्यक्तिमुपागतम्

akiñcananidhiṁ sūtimapavargatrivargayoḥ |
añjanādrīśvaradayāmabhiṣṭaumi nirañjanām

अकिञ्चननिधिं सूतिमपवर्गत्रिवर्गयोः ।
अञ्जनाद्रीश्वरदयामभिष्टौमि निरञ्जनाम्

anucaraśaktyādiguṇāmagresarabodhaviracitālokām |
svādhīnavr̥ṣagirīśāṁ svayaṁ prabhūtāṁ pramāṇayāmi dayām

अनुचरशक्त्यादिगुणामग्रेसरबोधविरचितालोकाम् ।
स्वाधीनवृषगिरीशां स्वयं प्रभूतां प्रमाणयामि दयाम्

api nikhilalokasucaritamuṣṭindhayaduritamūrchanājuṣṭam |
sañjīvayatu daye māmañjanagirinātharañjanī bhavatī

अपि निखिललोकसुचरितमुष्टिन्धयदुरितमूर्छनाजुष्टम् ।
सञ्जीवयतु दये मामञ्जनगिरिनाथरञ्जनी भवती

bhagavati daye bhavatyāṁ vr̥ṣagirināthe samāplute tuṅge |
apratighamajjanānāṁ hastālambo madāgasāṁ mr̥gyaḥ

भगवति दये भवत्यां वृषगिरिनाथे समाप्लुते तुङ्गे ।
अप्रतिघमज्जनानां हस्तालम्बो मदागसां मृग्यः

kr̥paṇajanakalpalatikāṁ kr̥tāparādhasya niṣkriyāmādyām |
vr̥ṣagirināthadaye tvāṁ vidanti saṁsāratāriṇīṁ vibudhāḥ

कृपणजनकल्पलतिकां कृतापराधस्य निष्क्रियामाद्याम् ।
वृषगिरिनाथदये त्वां विदन्ति संसारतारिणीं विबुधाः

vr̥ṣagirigr̥hamedhiguṇā bodhabalaiśvaryavīryaśaktimukhāḥ |
doṣā bhaveyurete yadi nāma daye tvayā vinābhūtāḥ

वृषगिरिगृहमेधिगुणा बोधबलैश्वर्यवीर्यशक्तिमुखाः ।
दोषा भवेयुरेते यदि नाम दये त्वया विनाभूताः

āsr̥ṣṭi santatānāmaparādhānāṁ nirodhinīṁ jagataḥ |
padmāsahāyakaruṇe pratisañcarakelimācarasi

आसृष्टि सन्ततानामपराधानां निरोधिनीं जगतः ।
पद्मासहायकरुणे प्रतिसञ्चरकेलिमाचरसि

acidaviśiṣṭānpralaye jantūnavalokya jātanirvedā |
karaṇakalebarayogaṁ vitarasi vr̥ṣaśailanāthakaruṇe tvam

अचिदविशिष्टान्प्रलये जन्तूनवलोक्य जातनिर्वेदा ।
करणकलेबरयोगं वितरसि वृषशैलनाथकरुणे त्वम्

anuguṇadaśārpitena śrīdharakaruṇe samāhitasnehā |
śamayasi tamaḥ prajānāṁ śāstramayena sthirapradīpena

अनुगुणदशार्पितेन श्रीधरकरुणे समाहितस्नेहा ।
शमयसि तमः प्रजानां शास्त्रमयेन स्थिरप्रदीपेन

ruḍhā vr̥ṣācalapateḥ pāde mukhakāntipatralacchāyā |
karuṇe sukhayasi vinatāṅkaṭākṣaviṭapaiḥ karāpaceyaphalaiḥ

रुढा वृषाचलपतेः पादे मुखकान्तिपत्रलच्छाया ।
करुणे सुखयसि विनताङ्कटाक्षविटपैः करापचेयफलैः

nayane vr̥ṣācalendostārāmaitrīṁ dadhānayā karuṇe |
dr̥ṣṭastvayaiva janimānapavargamakr̥ṣṭapacyamanubhavati

नयने वृषाचलेन्दोस्तारामैत्रीं दधानया करुणे ।
दृष्टस्त्वयैव जनिमानपवर्गमकृष्टपच्यमनुभवति

samayopanataistava pravāhairanukampe kr̥tasamplavā dharitrī |
śaraṇāgatasasyamālinīyaṁ vr̥ṣaśaileśakr̥ṣīvalaṁ dhinoti

समयोपनतैस्तव प्रवाहैरनुकम्पे कृतसम्प्लवा धरित्री ।
शरणागतसस्यमालिनीयं वृषशैलेशकृषीवलं धिनोति

kalaśodadhisampado bhavatyāḥ karuṇe sanmatimanthasaṁskr̥tāyāḥ |
amr̥tāṁśamavaimi divyadehaṁ mr̥tasañjīvanamañjanācalendoḥ

कलशोदधिसम्पदो भवत्याः करुणे सन्मतिमन्थसंस्कृतायाः ।
अमृतांशमवैमि दिव्यदेहं मृतसञ्जीवनमञ्जनाचलेन्दोः

jaladheriva śītatā daye tvaṁ vr̥ṣaśailādhipatessvabhāvabhūtā |
pralayārabhaṭīṁnaṭīṁ tadīkṣāṁ prasabhaṁ grāhayasi prasaktilāsyam

जलधेरिव शीतता दये त्वं वृषशैलाधिपतेस्स्वभावभूता ।
प्रलयारभटींनटीं तदीक्षां प्रसभं ग्राहयसि प्रसक्तिलास्यम्

praṇatapratikūlamūlaghātī pratighaḥ ko’pi vr̥ṣācaleśvarasya |
kalame yavasāpacāyanītyā karuṇe kiṅkaratāṁ tavopayāti

प्रणतप्रतिकूलमूलघाती प्रतिघः कोऽपि वृषाचलेश्वरस्य ।
कलमे यवसापचायनीत्या करुणे किङ्करतां तवोपयाति

abahiṣkr̥tanigrahānvidantaḥ kamalākāntaguṇānsvatantratādīn |
avikalpamanugrahaṁ duhānāṁ bhavatīmeva daye bhajanti santaḥ

अबहिष्कृतनिग्रहान्विदन्तः कमलाकान्तगुणान्स्वतन्त्रतादीन् ।
अविकल्पमनुग्रहं दुहानां भवतीमेव दये भजन्ति सन्तः

kamalānilayastvayā dayāluḥ karuṇe niṣkaruṇā nirūpaṇe tvam |
ata eva hi tāvakāśritānāṁ duritānāṁ bhavati tvadeva bhītiḥ

कमलानिलयस्त्वया दयालुः करुणे निष्करुणा निरूपणे त्वम् ।
अत एव हि तावकाश्रितानां दुरितानां भवति त्वदेव भीतिः

atilaṅghitaśāsaneṣvabhīkṣṇaṁ vr̥ṣaśailādhipatirvijr̥mbhitoṣmā |
punareva daye kṣamānidānairbhavatīmādriyate bhavatyadhīnaiḥ

अतिलङ्घितशासनेष्वभीक्ष्णं वृषशैलाधिपतिर्विजृम्भितोष्मा ।
पुनरेव दये क्षमानिदानैर्भवतीमाद्रियते भवत्यधीनैः

karuṇe duriteṣu māmakeṣu pratikārāntaradurjayeṣu khinnaḥ |
kavacāyitayā tvayaiva śārṅgī vijayasthānamupāśrito vr̥ṣādrim

करुणे दुरितेषु मामकेषु प्रतिकारान्तरदुर्जयेषु खिन्नः ।
कवचायितया त्वयैव शार्ङ्गी विजयस्थानमुपाश्रितो वृषाद्रिम्

mayi tiṣṭhati duṣkr̥tāṁ pradhāne mitadoṣānitarānvicinvatī tvam |
aparādhagaṇairapūrṇakukṣiḥ kamalākāntadaye kathaṁ bhavitrī

मयि तिष्ठति दुष्कृतां प्रधाने मितदोषानितरान्विचिन्वती त्वम् ।
अपराधगणैरपूर्णकुक्षिः कमलाकान्तदये कथं भवित्री

ahamasmyaparādhacakravartī karuṇe tvaṁ ca guṇeṣu sārvabhaumī |
viduṣī sthitimīdr̥śīṁ svayaṁ māṁ vr̥ṣaśaileśvarapādasātkuru tvam

अहमस्म्यपराधचक्रवर्ती करुणे त्वं च गुणेषु सार्वभौमी ।
विदुषी स्थितिमीदृशीं स्वयं मां वृषशैलेश्वरपादसात्कुरु त्वम्

aśithilakaraṇe’sminnakṣataśvāsavr̥ttau
vapuṣi gamanayogye vāsamāsādayeyam |
vr̥ṣagirikaṭakeṣu vyañjayatsu pratītai-
rmadhumathanadaye tvāṁ vāridhārāviśeṣaiḥ

अशिथिलकरणेऽस्मिन्नक्षतश्वासवृत्तौ
वपुषि गमनयोग्ये वासमासादयेयम् ।
वृषगिरिकटकेषु व्यञ्जयत्सु प्रतीतै-
र्मधुमथनदये त्वां वारिधाराविशेषैः

aviditanijayogakṣemamātmānabhijñaṁ
guṇalavarahitaṁ māṁ goptukāmā daye tvam |
paravati caturaiste vibhramaiḥ śrīnivāse
bahumatimanapāyāṁ vindasi śrīdharaṇyoḥ

अविदितनिजयोगक्षेममात्मानभिज्ञं
गुणलवरहितं मां गोप्तुकामा दये त्वम् ।
परवति चतुरैस्ते विभ्रमैः श्रीनिवासे
बहुमतिमनपायां विन्दसि श्रीधरण्योः

phalavitaraṇadakṣaṁ pakṣapātānabhijñaṁ
praguṇamanuvidheyaṁ prāpya padmāsahāyam |
mahati guṇasamāje mānapūrvaṁ daye tvaṁ
prativadasi yathārhaṁ pāpmanāṁ māmakānām

फलवितरणदक्षं पक्षपातानभिज्ञं
प्रगुणमनुविधेयं प्राप्य पद्मासहायम् ।
महति गुणसमाजे मानपूर्वं दये त्वं
प्रतिवदसि यथार्हं पाप्मनां मामकानाम्

anubhavitumaghaughaṁ nālamāgāmikālaḥ
praśamayitumaśeṣaṁ niṣkriyābhirna śakyam |
svayamiti hi daye tvaṁ svīkr̥taśrīnivāsā
śithilitabhavabhītiśśreyase jāyase naḥ

अनुभवितुमघौघं नालमागामिकालः
प्रशमयितुमशेषं निष्क्रियाभिर्न शक्यम् ।
स्वयमिति हि दये त्वं स्वीकृतश्रीनिवासा
शिथिलितभवभीतिश्श्रेयसे जायसे नः

avataraṇaviśeṣairātmalīlāpadeśai-
ravamatimanukampe mandacitteṣu vindan |
vr̥ṣabhaśikharināthastvannideśena nūnaṁ
bhajati caraṇabhājāṁ bhāvino janmabhedān

अवतरणविशेषैरात्मलीलापदेशै-
रवमतिमनुकम्पे मन्दचित्तेषु विन्दन् ।
वृषभशिखरिनाथस्त्वन्निदेशेन नूनं
भजति चरणभाजां भाविनो जन्मभेदान्

parahitamanukampe bhāvayantyāṁ bhavatyāṁ
sthiramanupadhi hārdaṁ śrīnivāso dadhānaḥ |
lalitaruciṣu lakṣmībhūminīlāsu nūnaṁ
prathayati bahumānaṁ tvatpraticchandabuddhyā

परहितमनुकम्पे भावयन्त्यां भवत्यां
स्थिरमनुपधि हार्दं श्रीनिवासो दधानः ।
ललितरुचिषु लक्ष्मीभूमिनीलासु नूनं
प्रथयति बहुमानं त्वत्प्रतिच्छन्दबुद्ध्या

vr̥ṣagirisavidheṣu vyājato vāsabhājāṁ
duritakaluṣitānāṁ dūyamānā daye tvam |
karaṇavilayakāle kāndiśīkasmr̥tīnāṁ
smarayasi bahulīlaṁ mādhavaṁ sāvadhānā

वृषगिरिसविधेषु व्याजतो वासभाजां
दुरितकलुषितानां दूयमाना दये त्वम् ।
करणविलयकाले कान्दिशीकस्मृतीनां
स्मरयसि बहुलीलं माधवं सावधाना

diśi diśi gatividbhirdeśikairnīyamānā
sthirataramanukampe styānalagnā guṇaistvam |
parigatavr̥ṣaśailaṁ pāramāropayantī
bhavajaladhigatānāṁ potapātrī bhavitrī

दिशि दिशि गतिविद्भिर्देशिकैर्नीयमाना
स्थिरतरमनुकम्पे स्त्यानलग्ना गुणैस्त्वम् ।
परिगतवृषशैलं पारमारोपयन्ती
भवजलधिगतानां पोतपात्री भवित्री

parimitaphalasaṅgātprāṇinaḥ kimpacānā
nigamavipaṇimadhye nityamuktānuṣaktam |
prasadanamanukampe prāptavatyāṁ bhavatyāṁ
vr̥ṣagiriharinīlaṁ vyañjitaṁ nirviśanti

परिमितफलसङ्गात्प्राणिनः किम्पचाना
निगमविपणिमध्ये नित्यमुक्तानुषक्तम् ।
प्रसदनमनुकम्पे प्राप्तवत्यां भवत्यां
वृषगिरिहरिनीलं व्यञ्जितं निर्विशन्ति

tvayi bahumatihīnaḥ śrīnivāsānukampe
jagati gatimihānyāṁ devi sammanyate yaḥ |
sa khalu vibudhasindhau sannikarṣe vahantyāṁ
śamayati mr̥gatr̥ṣṇāvīcikābhiḥ pipāsām

त्वयि बहुमतिहीनः श्रीनिवासानुकम्पे
जगति गतिमिहान्यां देवि सम्मन्यते यः ।
स खलु विबुधसिन्धौ सन्निकर्षे वहन्त्यां
शमयति मृगतृष्णावीचिकाभिः पिपासाम्

ājñāṁ khyātiṁ dhanamanucarānādhirājyādikaṁ vā
kāle dr̥ṣṭvā kamalavasaterapyakiñcitkarāṇi |
padmākāntaṁ praṇihitavatīṁ pālane’nanyasādhye
sārābhijñā jagati kr̥tinassaṁśrayante daye tvām

आज्ञां ख्यातिं धनमनुचरानाधिराज्यादिकं वा
काले दृष्ट्वा कमलवसतेरप्यकिञ्चित्कराणि ।
पद्माकान्तं प्रणिहितवतीं पालनेऽनन्यसाध्ये
साराभिज्ञा जगति कृतिनस्संश्रयन्ते दये त्वाम्

prājāpatyaprabhr̥tivibhavaṁ prekṣya paryāyaduḥkhaṁ
janmākāṅkṣan vr̥ṣagirivane jagmuṣāṁ tasthuṣāṁ vā |
āśāsānāḥ katicana vibhoḥ tvatpariṣvaṅgadhanyaiḥ
aṅgīkāraṁ kṣaṇamapi daye hārdatuṅgairapāṅgaiḥ

प्राजापत्यप्रभृतिविभवं प्रेक्ष्य पर्यायदुःखं
जन्माकाङ्क्षन् वृषगिरिवने जग्मुषां तस्थुषां वा ।
आशासानाः कतिचन विभोः त्वत्परिष्वङ्गधन्यैः
अङ्गीकारं क्षणमपि दये हार्दतुङ्गैरपाङ्गैः

nābhīpadmasphuraṇasubhagā navyanīlotpalābhā
krīḍāśailaṁ kamapi karuṇe vr̥ṇvatī veṅkaṭākhyam |
śītā nityaṁ prasadanavatī śraddhadhānāvagāhyā
divyā kācijjayati mahatī dīrghikā tāvakīnā

नाभीपद्मस्फुरणसुभगा नव्यनीलोत्पलाभा
क्रीडाशैलं कमपि करुणे वृण्वती वेङ्कटाख्यम् ।
शीता नित्यं प्रसदनवती श्रद्धधानावगाह्या
दिव्या काचिज्जयति महती दीर्घिका तावकीना

yasmindr̥ṣṭe taditarasukhairgamyate goṣpadatvaṁ
satyaṁ jñānaṁ tribhiravadhibhirmuktamānandasindhum |
tvatsvīkārāttamiha kr̥tinassūribr̥ndānubhāvyaṁ
nityāpūrvaṁ nidhimiva daye nirviśantyañjanādrau

यस्मिन्दृष्टे तदितरसुखैर्गम्यते गोष्पदत्वं
सत्यं ज्ञानं त्रिभिरवधिभिर्मुक्तमानन्दसिन्धुम् ।
त्वत्स्वीकारात्तमिह कृतिनस्सूरिबृन्दानुभाव्यं
नित्यापूर्वं निधिमिव दये निर्विशन्त्यञ्जनाद्रौ

sāraṁ labdhvā kamapi mahataḥ śrīnivāsāmburāśeḥ
kāle kāle ghanarasavatī kālikevānukampe |
vyaktonmeṣā mr̥gapatigirau viśvamāpyāyayantī
śīlopajñaṁ kṣarati bhavatī śītalaṁ sadguṇaugham

सारं लब्ध्वा कमपि महतः श्रीनिवासाम्बुराशेः
काले काले घनरसवती कालिकेवानुकम्पे ।
व्यक्तोन्मेषा मृगपतिगिरौ विश्वमाप्याययन्ती
शीलोपज्ञं क्षरति भवती शीतलं सद्गुणौघम्

bhīme nityaṁ bhavajalanidhau majjatāṁ mānavānā-
mālambārthaṁ vr̥ṣagiripatistvannideśātprayuṅkte |
prajñāsāraṁ prakr̥timahatā mūlabhāgena juṣṭaṁ
śākhābhedaissubhagamanaghaṁ śāśvataṁ śāstrapāṇim

भीमे नित्यं भवजलनिधौ मज्जतां मानवाना-
मालम्बार्थं वृषगिरिपतिस्त्वन्निदेशात्प्रयुङ्क्ते ।
प्रज्ञासारं प्रकृतिमहता मूलभागेन जुष्टं
शाखाभेदैस्सुभगमनघं शाश्वतं शास्त्रपाणिम्

vidvatsevākatakanikaṣairvītapaṅkāśayānāṁ
padmākāntaḥ praṇayati daye darpaṇaṁ te svaśāstram |
līlādakṣāṁ tvadanavasare lālayanvipralipsāṁ
māyāśāstrāṇyapi śamayituṁ tvatprapannapratīpān

विद्वत्सेवाकतकनिकषैर्वीतपङ्काशयानां
पद्माकान्तः प्रणयति दये दर्पणं ते स्वशास्त्रम् ।
लीलादक्षां त्वदनवसरे लालयन्विप्रलिप्सां
मायाशास्त्राण्यपि शमयितुं त्वत्प्रपन्नप्रतीपान्

daivātprāpte vr̥ṣagiritaṭaṁ dehini tvannidānā-
tsvāminpāhītyavaśavacane vindati svāpamantyam |
devaḥ śrīmān diśati karuṇe dr̥ṣṭimicchaṁstvadīyā-
mudghātena śrutipariṣadāmuttareṇābhimukhyam

दैवात्प्राप्ते वृषगिरितटं देहिनि त्वन्निदाना-
त्स्वामिन्पाहीत्यवशवचने विन्दति स्वापमन्त्यम् ।
देवः श्रीमान् दिशति करुणे दृष्टिमिच्छंस्त्वदीया-
मुद्घातेन श्रुतिपरिषदामुत्तरेणाभिमुख्यम्

śreyassūtiṁ sakr̥dapi daye sammatāṁ yassakhīṁ te
śītodārāmalabhata janaḥ śrīnivāsasya dr̥ṣṭim |
devādīnāmayamanr̥ṇatāṁ dehavattve’pi vinda-
nbandhānmukto balibhiranaghaiḥ pūryate tatprayuktaiḥ

श्रेयस्सूतिं सकृदपि दये सम्मतां यस्सखीं ते
शीतोदारामलभत जनः श्रीनिवासस्य दृष्टिम् ।
देवादीनामयमनृणतां देहवत्त्वेऽपि विन्द-
न्बन्धान्मुक्तो बलिभिरनघैः पूर्यते तत्प्रयुक्तैः

divyāpāṅgaṁ diśasi karuṇe yeṣu saddeśikātmā
kṣipraṁ prāptā vr̥ṣagiripatiṁ kṣatrabandhvādayaste |
viśvācāryā vidhiśivamukhāssvādhikāroparuddhā
manye mātā jaḍa iva sute vatsalā mādr̥śe tvam

दिव्यापाङ्गं दिशसि करुणे येषु सद्देशिकात्मा
क्षिप्रं प्राप्ता वृषगिरिपतिं क्षत्रबन्ध्वादयस्ते ।
विश्वाचार्या विधिशिवमुखास्स्वाधिकारोपरुद्धा
मन्ये माता जड इव सुते वत्सला मादृशे त्वम्

atikr̥paṇo’pi janturadhigamya daye bhavatī-
maśithiladharmasetupadavīṁ rucirāmacirāt |
amitamahormijālamatilaṅghya bhavāmbunidhiṁ
bhavati vr̥ṣācaleśapadapattananityadhanī

अतिकृपणोऽपि जन्तुरधिगम्य दये भवती-
मशिथिलधर्मसेतुपदवीं रुचिरामचिरात् ।
अमितमहोर्मिजालमतिलङ्घ्य भवाम्बुनिधिं
भवति वृषाचलेशपदपत्तननित्यधनी

abhimukhabhāvasampadabhisambhavināṁ bhavināṁ
kvacidupalakṣitā kvacidabhaṅguragūḍhagatiḥ |
vimalarasāvahā vr̥ṣagirīśadaye bhavatī
sapadi sarasvatīva śamayatyaghamapratigham

अभिमुखभावसम्पदभिसम्भविनां भविनां
क्वचिदुपलक्षिता क्वचिदभङ्गुरगूढगतिः ।
विमलरसावहा वृषगिरीशदये भवती
सपदि सरस्वतीव शमयत्यघमप्रतिघम्

api karuṇe janasya taruṇenduvibhūṣaṇatā-
mapi kamalāsanatvamapi dhāma vr̥ṣādripateḥ |
taratamatāvaśena tanute nanu te vitatiḥ
parahitavarṣmaṇā paripacelimakelimatī

अपि करुणे जनस्य तरुणेन्दुविभूषणता-
मपि कमलासनत्वमपि धाम वृषाद्रिपतेः ।
तरतमतावशेन तनुते ननु ते विततिः
परहितवर्ष्मणा परिपचेलिमकेलिमती

dhr̥tabhuvanā daye trividhagatyanukūlatarā
vr̥ṣagirināthapādaparirambhavatī bhavatī |
aviditavaibhavā’pi surasindhurivātanute
sakr̥davagāhamānamapatāpamapāpamapi

धृतभुवना दये त्रिविधगत्यनुकूलतरा
वृषगिरिनाथपादपरिरम्भवती भवती ।
अविदितवैभवाऽपि सुरसिन्धुरिवातनुते
सकृदवगाहमानमपतापमपापमपि

nigamasamāśritā nikhilalokasamr̥ddhikarī
bhajadaghakūlamudvahagatiḥ paritaptahitā |
prakaṭitahaṁsamatsyakamaṭhādyavatāraśatā
vibudhasaricchriyaṁ vr̥ṣagirīśadaye vahasi

निगमसमाश्रिता निखिललोकसमृद्धिकरी
भजदघकूलमुद्वहगतिः परितप्तहिता ।
प्रकटितहंसमत्स्यकमठाद्यवतारशता
विबुधसरिच्छ्रियं वृषगिरीशदये वहसि

jagati mitampacā tvaditarā tu daye taralā
phalaniyamojjhitā bhavati santapanāya punaḥ |
tvamiha niraṅkuśapraśakanādivibhūtimatī
vitarasi dehināṁ niravadhiṁ vr̥ṣaśailanidhim

जगति मितम्पचा त्वदितरा तु दये तरला
फलनियमोज्झिता भवति सन्तपनाय पुनः ।
त्वमिह निरङ्कुशप्रशकनादिविभूतिमती
वितरसि देहिनां निरवधिं वृषशैलनिधिम्

sakaruṇalaukikaprabhuparigrahanigrahayo-
rniyatimupādhicakraparivr̥ttiparamparayā |
vr̥ṣabhamahīdhareśakaruṇe vitaraṅgayatāṁ
śrutimitasampadi tvayi kathaṁ bhavitā viśayaḥ

सकरुणलौकिकप्रभुपरिग्रहनिग्रहयो-
र्नियतिमुपाधिचक्रपरिवृत्तिपरम्परया ।
वृषभमहीधरेशकरुणे वितरङ्गयतां
श्रुतिमितसम्पदि त्वयि कथं भविता विशयः

vr̥ṣagirikr̥ṣṇameghajanitāṁ janitāpaharāṁ
tvadabhimatiṁ suvr̥ṣṭimupajīvya nivr̥ttatr̥ṣaḥ |
bahuṣu jalāśayeṣu bahumānamapohya daye
na jahati satpathaṁ jagati cātakavatkr̥tinaḥ

वृषगिरिकृष्णमेघजनितां जनितापहरां
त्वदभिमतिं सुवृष्टिमुपजीव्य निवृत्ततृषः ।
बहुषु जलाशयेषु बहुमानमपोह्य दये
न जहति सत्पथं जगति चातकवत्कृतिनः

tvadudayatūlikābhiramunā vr̥ṣaśailajuṣā
sthirataraśilpinaiva parikalpitacitradhiyaḥ |
yatipatiyāmunaprabhr̥tayaḥ prathayanti daye
jagati hitaṁ na nastvayi bharanyasanādadhikam

त्वदुदयतूलिकाभिरमुना वृषशैलजुषा
स्थिरतरशिल्पिनैव परिकल्पितचित्रधियः ।
यतिपतियामुनप्रभृतयः प्रथयन्ति दये
जगति हितं न नस्त्वयि भरन्यसनादधिकम्

mr̥duhr̥daye daye mr̥ditakāmahite mahite
dhr̥tavibudhe budheṣu vitatātmadhure madhure |
vr̥ṣagirisārvabhaumadayite mayi te mahatīṁ
bhavukanidhe nidhehi bhavamūlaharāṁ laharīm

मृदुहृदये दये मृदितकामहिते महिते
धृतविबुधे बुधेषु विततात्मधुरे मधुरे ।
वृषगिरिसार्वभौमदयिते मयि ते महतीं
भवुकनिधे निधेहि भवमूलहरां लहरीम्

akūpārairekodakasamayavaitaṇḍikajavai-
ranirvāpyāṁ kṣipraṁ kṣapayitumavidyākhyabaḍabām |
kr̥pe tvaṁ tattādr̥kprathimavr̥ṣapr̥thvīdharapati-
svarūpadvaiguṇyadviguṇanijabinduḥ prabhavasi

अकूपारैरेकोदकसमयवैतण्डिकजवै-
रनिर्वाप्यां क्षिप्रं क्षपयितुमविद्याख्यबडबाम् ।
कृपे त्वं तत्तादृक्प्रथिमवृषपृथ्वीधरपति-
स्वरूपद्वैगुण्यद्विगुणनिजबिन्दुः प्रभवसि

vivitsāvetālīvigamapariśuddhe’pi hr̥daye
paṭupratyāhāraprabhr̥tipuṭapākapracakitāḥ |
namantastvāṁ nārāyaṇaśikharikūṭasthakaruṇe
niruddhatvaddrohā nr̥patisutanītiṁ na jahati

विवित्सावेतालीविगमपरिशुद्धेऽपि हृदये
पटुप्रत्याहारप्रभृतिपुटपाकप्रचकिताः ।
नमन्तस्त्वां नारायणशिखरिकूटस्थकरुणे
निरुद्धत्वद्द्रोहा नृपतिसुतनीतिं न जहति

ananyādhīnassanbhavati paratantraḥ praṇamatāṁ
kr̥pe sarvadraṣṭā na gaṇayati teṣāmapakr̥tim |
patistvatpārārthyaṁ prathayati vr̥ṣakṣmādharapati-
rvyavasthāṁ vaiyātyāditi vighaṭayantī viharasi

अनन्याधीनस्सन्भवति परतन्त्रः प्रणमतां
कृपे सर्वद्रष्टा न गणयति तेषामपकृतिम् ।
पतिस्त्वत्पारार्थ्यं प्रथयति वृषक्ष्माधरपति-
र्व्यवस्थां वैयात्यादिति विघटयन्ती विहरसि

apāṁ patyuśśatrūnasahanamunerdharmanigalaṁ
kr̥pe kākasyaikaṁ hitamiti hinasti sma nayanam |
vilīnasvātantryo vr̥ṣagiripatistvadvihr̥tibhi-
rdiśatyevaṁ devo janitasugatiṁ daṇḍanagatim

अपां पत्युश्शत्रूनसहनमुनेर्धर्मनिगलं
कृपे काकस्यैकं हितमिति हिनस्ति स्म नयनम् ।
विलीनस्वातन्त्र्यो वृषगिरिपतिस्त्वद्विहृतिभि-
र्दिशत्येवं देवो जनितसुगतिं दण्डनगतिम्

niṣādānāṁ netā kapikulapatiḥ kāpi śabarī
kucelaḥ kubjā sā vrajayuvatayo mālyakr̥diti |
amīṣāṁ nimnatvaṁ vr̥ṣagiripaterunnatimapi
prabhūtaissrotobhiḥ prasabhamanukampe śamayasi

निषादानां नेता कपिकुलपतिः कापि शबरी
कुचेलः कुब्जा सा व्रजयुवतयो माल्यकृदिति ।
अमीषां निम्नत्वं वृषगिरिपतेरुन्नतिमपि
प्रभूतैस्स्रोतोभिः प्रसभमनुकम्पे शमयसि

tvayā dr̥ṣṭastuṣṭiṁ bhajati parameṣṭhī nijapade
vahanmūrtīraṣṭau viharati mr̥ḍānīparibr̥ḍhaḥ |
bibharti svārājyaṁ vr̥ṣaśikhariśr̥ṅgārikaruṇe
śunāsīro devāsurasamaranāsīrasubhaṭaḥ

त्वया दृष्टस्तुष्टिं भजति परमेष्ठी निजपदे
वहन्मूर्तीरष्टौ विहरति मृडानीपरिबृढः ।
बिभर्ति स्वाराज्यं वृषशिखरिशृङ्गारिकरुणे
शुनासीरो देवासुरसमरनासीरसुभटः

daye dugdhodanvadvyatiyutasudhāsindhunayata-
stvadāśleṣānnityaṁ janitamr̥tasañjīvanadaśāḥ |
svadante dāntebhyaśśrutivadanakarpūragulikā
vivr̥ṇvantaścittaṁ vr̥ṣaśikhariviśvambharaguṇāḥ

दये दुग्धोदन्वद्व्यतियुतसुधासिन्धुनयत-
स्त्वदाश्लेषान्नित्यं जनितमृतसञ्जीवनदशाः ।
स्वदन्ते दान्तेभ्यश्श्रुतिवदनकर्पूरगुलिका
विवृण्वन्तश्चित्तं वृषशिखरिविश्वम्भरगुणाः

jagajjanmasthemapralayaracanākelirasiko
vimuktyaikadvāraṁ vighaṭitakavāṭaṁ praṇayinām |
iti tvayyāyattaṁ dvitayamupadhīkr̥tya karuṇe
viśuddhānāṁ vācāṁ vr̥ṣaśikharināthasstutipadam

जगज्जन्मस्थेमप्रलयरचनाकेलिरसिको
विमुक्त्यैकद्वारं विघटितकवाटं प्रणयिनाम् ।
इति त्वय्यायत्तं द्वितयमुपधीकृत्य करुणे
विशुद्धानां वाचां वृषशिखरिनाथस्स्तुतिपदम्

kalikṣobhonmīlatkṣitikaluṣakūlaṅkaṣajavai-
ranucchedai retairavaṭataṭavaiṣamyarahitaiḥ |
pravāhaiste padmāsahacarapariṣkāriṇi kr̥pe
vikalpante’nalpā vr̥ṣaśikhariṇo nirjharaguṇāḥ

कलिक्षोभोन्मीलत्क्षितिकलुषकूलङ्कषजवै-
रनुच्छेदै रेतैरवटतटवैषम्यरहितैः ।
प्रवाहैस्ते पद्मासहचरपरिष्कारिणि कृपे
विकल्पन्तेऽनल्पा वृषशिखरिणो निर्झरगुणाः

khilaṁ cetovr̥tteḥ kimidamiti vismerabhuvanaṁ
kr̥pe siṁhakṣmābhr̥tkr̥tamukhacamatkārakaraṇam |
bharanyāsacchannaprabalavr̥jinaprābhr̥tabhr̥tāṁ
pratiprasthānaṁ te śrutinagaraśr̥ṅgāṭakajuṣaḥ

खिलं चेतोवृत्तेः किमिदमिति विस्मेरभुवनं
कृपे सिंहक्ष्माभृत्कृतमुखचमत्कारकरणम् ।
भरन्यासच्छन्नप्रबलवृजिनप्राभृतभृतां
प्रतिप्रस्थानं ते श्रुतिनगरशृङ्गाटकजुषः

trividhacidacitsattāsthemapravr̥ttiniyāmikā
vr̥ṣagirivibhoricchā sā tvaṁ parairaparāhatā |
kr̥paṇabharabhr̥tkiṅkurvāṇaprabhūtaguṇāntarā
vahasi karuṇe vaicakṣaṇyaṁ madīkṣaṇasāhase

त्रिविधचिदचित्सत्तास्थेमप्रवृत्तिनियामिका
वृषगिरिविभोरिच्छा सा त्वं परैरपराहता ।
कृपणभरभृत्किङ्कुर्वाणप्रभूतगुणान्तरा
वहसि करुणे वैचक्षण्यं मदीक्षणसाहसे

vr̥ṣagiripaterhr̥dyā viśvāvatārasahāyinī
kṣapitanikhilāvadyā devi kṣamādiniṣevitā |
bhuvanajananī puṁsāṁ bhogāpavargavidhāyinī
vitamasi pade vyaktiṁ nityāṁ bibharṣi daye svayam

वृषगिरिपतेर्हृद्या विश्वावतारसहायिनी
क्षपितनिखिलावद्या देवि क्षमादिनिषेविता ।
भुवनजननी पुंसां भोगापवर्गविधायिनी
वितमसि पदे व्यक्तिं नित्यां बिभर्षि दये स्वयम्

svayamudayinassiddhādyāviṣkr̥tāśca śubhālayā
vividhavibhavavyūhāvāsāḥ paraṁ ca padaṁ vibhoḥ |
vr̥ṣagirimukheṣveteṣvicchāvadhi pratilabdhaye
dr̥ḍhavinihitā niśreṇistvaṁ daye nijaparvabhiḥ

स्वयमुदयिनस्सिद्धाद्याविष्कृताश्च शुभालया
विविधविभवव्यूहावासाः परं च पदं विभोः ।
वृषगिरिमुखेष्वेतेष्विच्छावधि प्रतिलब्धये
दृढविनिहिता निश्रेणिस्त्वं दये निजपर्वभिः

hitamiti jagaddr̥ṣṭyā kluptairakluptaphalāntarai-
ramativihitairanyairdharmāyitaiśca yadr̥cchayā |
pariṇatabahucchadmā padmāsahāyadaye svayaṁ
pradiśasi nijābhipretaṁ naḥ praśāmyadapatrapā

हितमिति जगद्दृष्ट्या क्लुप्तैरक्लुप्तफलान्तरै-
रमतिविहितैरन्यैर्धर्मायितैश्च यदृच्छया ।
परिणतबहुच्छद्मा पद्मासहायदये स्वयं
प्रदिशसि निजाभिप्रेतं नः प्रशाम्यदपत्रपा

atividhiśivairaiśvaryātmānubhūtirasairjanā-
nahr̥dayamihopacchandyaiṣāmasaṅgadaśārthinī |
tr̥ṣitajanatātīrthasnānakramakṣapitainasāṁ
vitarasi daye vītātaṅkā vr̥ṣādripateḥ padam

अतिविधिशिवैरैश्वर्यात्मानुभूतिरसैर्जना-
नहृदयमिहोपच्छन्द्यैषामसङ्गदशार्थिनी ।
तृषितजनतातीर्थस्नानक्रमक्षपितैनसां
वितरसि दये वीतातङ्का वृषाद्रिपतेः पदम्

vr̥ṣagirisudhāsindhau janturdaye nihitastvayā
bhavabhayaparītāpacchittyai bhajannaghamarṣaṇam |
muṣitakaluṣo mukteragresarairabhipūryate
svayamupanataissvātmānandaprabhr̥tyanubandhibhiḥ

वृषगिरिसुधासिन्धौ जन्तुर्दये निहितस्त्वया
भवभयपरीतापच्छित्त्यै भजन्नघमर्षणम् ।
मुषितकलुषो मुक्तेरग्रेसरैरभिपूर्यते
स्वयमुपनतैस्स्वात्मानन्दप्रभृत्यनुबन्धिभिः

anitarajuṣāmantarmūle’pyapāyapariplave
kr̥tavidanaghā vicchidyaiṣāṁ kr̥pe yamavaśyatām |
prapadanaphalapratyādeśaprasaṅgavivarjitaṁ
pratividhimupādhatse sārdhaṁ vr̥ṣādrihitaiṣiṇā

अनितरजुषामन्तर्मूलेऽप्यपायपरिप्लवे
कृतविदनघा विच्छिद्यैषां कृपे यमवश्यताम् ।
प्रपदनफलप्रत्यादेशप्रसङ्गविवर्जितं
प्रतिविधिमुपाधत्से सार्धं वृषाद्रिहितैषिणा

kṣaṇavilayināṁ śāstrārthānāṁ phalāya niveśite
pitr̥suragaṇe nirveśātprāgapi pralayaṁ gate |
adhigatavr̥ṣakṣmābhr̥nnāthāmakālavaśaṁvadāṁ
pratibhuvamiha vyācakhyustvāṁ kr̥pe nirupaplavām

क्षणविलयिनां शास्त्रार्थानां फलाय निवेशिते
पितृसुरगणे निर्वेशात्प्रागपि प्रलयं गते ।
अधिगतवृषक्ष्माभृन्नाथामकालवशंवदां
प्रतिभुवमिह व्याचख्युस्त्वां कृपे निरुपप्लवाम्

tvadupasadanādadya śvo vā mahāpralaye’pi vā
vitarati nijaṁ pādāmbhojaṁ vr̥ṣācalaśekharaḥ |
tadiha karuṇe tattatkrīḍātaraṅgaparamparā-
taratamatayā juṣṭāyāste duratyayatāṁ viduḥ

त्वदुपसदनादद्य श्वो वा महाप्रलयेऽपि वा
वितरति निजं पादाम्भोजं वृषाचलशेखरः ।
तदिह करुणे तत्तत्क्रीडातरङ्गपरम्परा-
तरतमतया जुष्टायास्ते दुरत्ययतां विदुः

praṇihitadhiyāṁ tvatsampr̥kte vr̥ṣādriśikhāmaṇau
prasr̥marasudhādhārākārā prasīdati bhāvanā |
dr̥ḍhamiti daye dattāsvādaṁ vimuktivalāhakaṁ
nibhr̥tagaruto nidhyāyanti sthirāśayacātakāḥ

प्रणिहितधियां त्वत्सम्पृक्ते वृषाद्रिशिखामणौ
प्रसृमरसुधाधाराकारा प्रसीदति भावना ।
दृढमिति दये दत्तास्वादं विमुक्तिवलाहकं
निभृतगरुतो निध्यायन्ति स्थिराशयचातकाः

kr̥pe vigatavelayā kr̥tasamagrapoṣaistvayā
kalijvalanadurgate jagati kālameghāyitam |
vr̥ṣakṣitidharādiṣu sthitipadeṣu sānuplavai-
rvr̥ṣādripativigrahairvyapagatākhilāvagrahaiḥ

कृपे विगतवेलया कृतसमग्रपोषैस्त्वया
कलिज्वलनदुर्गते जगति कालमेघायितम् ।
वृषक्षितिधरादिषु स्थितिपदेषु सानुप्लवै-
र्वृषाद्रिपतिविग्रहैर्व्यपगताखिलावग्रहैः

prasūya vividhaṁ jagattadabhivr̥ddhaye tvaṁ daye
samīkṣaṇavicintanaprabhr̥tibhissvayaṁ tādr̥śaiḥ |
vicitraguṇacitritāṁ vividhadoṣavaideśikīṁ
vr̥ṣācalapatestanuṁ viśasi matsyakūrmādikām

प्रसूय विविधं जगत्तदभिवृद्धये त्वं दये
समीक्षणविचिन्तनप्रभृतिभिस्स्वयं तादृशैः ।
विचित्रगुणचित्रितां विविधदोषवैदेशिकीं
वृषाचलपतेस्तनुं विशसि मत्स्यकूर्मादिकाम्

yugāntasamayocitaṁ bhajati yoganidrārasaṁ
vr̥ṣakṣitibhr̥dīśvare viharaṇakramājjāgrati |
udīrṇacaturarṇavīkadanavedinīṁ medinīṁ
samuddhr̥tavatī daye tvadabhijuṣṭayā daṁṣṭrayā

युगान्तसमयोचितं भजति योगनिद्रारसं
वृषक्षितिभृदीश्वरे विहरणक्रमाज्जाग्रति ।
उदीर्णचतुरर्णवीकदनवेदिनीं मेदिनीं
समुद्धृतवती दये त्वदभिजुष्टया दंष्ट्रया

saṭāpaṭalabhīṣaṇe sarabhasāṭ-ṭahāsodbhaṭe
sphuratkrudhi parisphuṭabhrukuṭike’pi vaktre kr̥te |
daye vr̥ṣagirīśiturdanujaḍimbhadattastanā
sarojasadr̥śā dr̥śā samuditākr̥tirdr̥śyase

सटापटलभीषणे सरभसाट्‍टहासोद्भटे
स्फुरत्क्रुधि परिस्फुटभ्रुकुटिकेऽपि वक्त्रे कृते ।
दये वृषगिरीशितुर्दनुजडिम्भदत्तस्तना
सरोजसदृशा दृशा समुदिताकृतिर्दृश्यसे

prasaktamadhunā vidhipraṇihitaissaparyodakai-
ssamastaduritacchidā nigamagandhinā tvaṁ daye |
aśeṣamaviśeṣatastrijagadañjanādrīśitu-
ścarācaramacīkaraścaraṇapaṅkajenāṅkitam

प्रसक्तमधुना विधिप्रणिहितैस्सपर्योदकै-
स्समस्तदुरितच्छिदा निगमगन्धिना त्वं दये ।
अशेषमविशेषतस्त्रिजगदञ्जनाद्रीशितु-
श्चराचरमचीकरश्चरणपङ्कजेनाङ्कितम्

paraśvathatapodhanaprathanasatkr̥tūpākr̥ta-
kṣitīśvarapaśukṣaratkṣatajakuṅkumasthāsakaiḥ |
vr̥ṣācaladayālunā nanu vihartumālipyathāḥ
nidhāya hr̥daye daye nihatarakṣitānāṁ hitam

परश्वथतपोधनप्रथनसत्कृतूपाकृत-
क्षितीश्वरपशुक्षरत्क्षतजकुङ्कुमस्थासकैः ।
वृषाचलदयालुना ननु विहर्तुमालिप्यथाः
निधाय हृदये दये निहतरक्षितानां हितम्

kr̥pe kr̥tajagaddhite kr̥paṇajantucintāmaṇe
ramāsahacaraṁ tadā raghudhurīṇayantyā tvayā |
vyabhajyata saritpatissakr̥davekṣaṇāttatkṣaṇā-
tprakr̥ṣṭabahupātakapraśamahetunā setunā

कृपे कृतजगद्धिते कृपणजन्तुचिन्तामणे
रमासहचरं तदा रघुधुरीणयन्त्या त्वया ।
व्यभज्यत सरित्पतिस्सकृदवेक्षणात्तत्क्षणा-
त्प्रकृष्टबहुपातकप्रशमहेतुना सेतुना

kr̥pe paravatastvayā vr̥ṣagirīśituḥ krīḍitaṁ
jagaddhitamaśeṣatastadidamitthamarthāpyate |
madacchalaparicyutapraṇataduṣkr̥taprekṣitai-
rhataprabaladānavairhaladharasya helāśataiḥ

कृपे परवतस्त्वया वृषगिरीशितुः क्रीडितं
जगद्धितमशेषतस्तदिदमित्थमर्थाप्यते ।
मदच्छलपरिच्युतप्रणतदुष्कृतप्रेक्षितै-
र्हतप्रबलदानवैर्हलधरस्य हेलाशतैः

prabhūtavibudhadviṣadbharaṇakhinnaviśvambharā-
bharāpanayanacchalāttvamavatārya lakṣmīdharam |
nirākr̥tavatī daye nigamasaudhadīpaśriyā
vipaścidavigītayā jagati gītayā’ndhaṁ tamaḥ

प्रभूतविबुधद्विषद्भरणखिन्नविश्वम्भरा-
भरापनयनच्छलात्त्वमवतार्य लक्ष्मीधरम् ।
निराकृतवती दये निगमसौधदीपश्रिया
विपश्चिदविगीतया जगति गीतयाऽन्धं तमः

vr̥ṣādrihayasādinaḥ prabaladormarutpreṅkhita-
stviṣā sphuṭataṭidguṇastvadavasekasaṁskāravān |
kariṣyati daye kaliprabalagharmanirmūlanaṁ
punaḥ kr̥tayugāṅkuraṁ bhuvi kr̥pāṇadhārādharaḥ

वृषाद्रिहयसादिनः प्रबलदोर्मरुत्प्रेङ्खित-
स्त्विषा स्फुटतटिद्गुणस्त्वदवसेकसंस्कारवान् ।
करिष्यति दये कलिप्रबलघर्मनिर्मूलनं
पुनः कृतयुगाङ्कुरं भुवि कृपाणधाराधरः

viśvopakāramiti nāma sadā duhānā-
madyāpi devi bhavatīmavadhīrayantam |
nāthe niveśaya vr̥ṣādripatau daye tvaṁ
nyastasvarakṣaṇabharaṁ tvayi māṁ tvayaiva

विश्वोपकारमिति नाम सदा दुहाना-
मद्यापि देवि भवतीमवधीरयन्तम् ।
नाथे निवेशय वृषाद्रिपतौ दये त्वं
न्यस्तस्वरक्षणभरं त्वयि मां त्वयैव

naisargikeṇa tarasā karuṇe niyuktā
nimnetare’pi mayi te vitatiryadi syāt |
vismāpayedvr̥ṣagirīśvaramapyavāryā
velātilaṅghanadaśeva mahāmburāśeḥ

नैसर्गिकेण तरसा करुणे नियुक्ता
निम्नेतरेऽपि मयि ते विततिर्यदि स्यात् ।
विस्मापयेद्वृषगिरीश्वरमप्यवार्या
वेलातिलङ्घनदशेव महाम्बुराशेः

vijñātaśāsanagatirviparītavr̥ttyā
vr̥trādibhiḥ paricitāṁ padavīṁ bhajāmi |
evaṁ vidhe vr̥ṣagirīśadaye mayi tvaṁ
dīne vibhośśamaya daṇḍadharatvalīlām

विज्ञातशासनगतिर्विपरीतवृत्त्या
वृत्रादिभिः परिचितां पदवीं भजामि ।
एवं विधे वृषगिरीशदये मयि त्वं
दीने विभोश्शमय दण्डधरत्वलीलाम्

māsāhasoktighanakañcukavañcitānyaḥ
paśyatsu teṣu vidadhāmyatisāhasāni |
padmāsahāyakaruṇe na ruṇatsi kiṁ tvaṁ
ghoraṁ kuliṅgaśakuneriva ceṣṭitaṁ me

मासाहसोक्तिघनकञ्चुकवञ्चितान्यः
पश्यत्सु तेषु विदधाम्यतिसाहसानि ।
पद्मासहायकरुणे न रुणत्सि किं त्वं
घोरं कुलिङ्गशकुनेरिव चेष्टितं मे

vikṣepamarhasi daye vipalāyite’pi
vyājaṁ vibhāvya vr̥ṣaśailapatervihāram |
svādhīnasatvasaraṇissvayamatra jantau
drāghīyasī dr̥ḍhatarā guṇavāgurā tvam

विक्षेपमर्हसि दये विपलायितेऽपि
व्याजं विभाव्य वृषशैलपतेर्विहारम् ।
स्वाधीनसत्वसरणिस्स्वयमत्र जन्तौ
द्राघीयसी दृढतरा गुणवागुरा त्वम्

santanyamānamaparādhagaṇaṁ vicintya
trasyāmi hanta bhavatīṁ ca vibhāvayāmi |
ahnāya me vr̥ṣagirīśadaye jahīmā-
māśīviṣagrahaṇakelinibhāmavasthām

सन्तन्यमानमपराधगणं विचिन्त्य
त्रस्यामि हन्त भवतीं च विभावयामि ।
अह्नाय मे वृषगिरीशदये जहीमा-
माशीविषग्रहणकेलिनिभामवस्थाम्

autsukyapūrvamupahr̥tya mahāparādhā-
nmātaḥ prasādayitumicchati me manastvām |
ālihya tānniravaśeṣamalabdhatr̥pti-
stāmyasyaho vr̥ṣagirīśadhr̥tā daye tvam

औत्सुक्यपूर्वमुपहृत्य महापराधा-
न्मातः प्रसादयितुमिच्छति मे मनस्त्वाम् ।
आलिह्य तान्निरवशेषमलब्धतृप्ति-
स्ताम्यस्यहो वृषगिरीशधृता दये त्वम्

jahyādvr̥ṣācalapatiḥ pratighe’pi na tvāṁ
gharmopatapta iva śītalatāmudanvān |
sā māmaruntudabharanyasanānuvr̥tti-
stadvīkṣaṇaiḥ spr̥śa daye tava kelipadmaiḥ

जह्याद्वृषाचलपतिः प्रतिघेऽपि न त्वां
घर्मोपतप्त इव शीतलतामुदन्वान् ।
सा मामरुन्तुदभरन्यसनानुवृत्ति-
स्तद्वीक्षणैः स्पृश दये तव केलिपद्मैः

dr̥ṣṭe’pi durbaladhiyaṁ damane’pi dr̥ptaṁ
snātvā’pi dhūlirasikaṁ bhajane’pi bhīmam |
baddhvā gr̥hāṇa vr̥ṣaśailapaterdaye māṁ
tvadvāraṇaṁ svayamanugrahaśr̥ṅkhalābhiḥ

दृष्टेऽपि दुर्बलधियं दमनेऽपि दृप्तं
स्नात्वाऽपि धूलिरसिकं भजनेऽपि भीमम् ।
बद्ध्वा गृहाण वृषशैलपतेर्दये मां
त्वद्वारणं स्वयमनुग्रहशृङ्खलाभिः

nātaḥ paraṁ kimapi me tvayi nāthanīyaṁ
mātardaye mayi kuruṣva tathā prasādam |
baddhādaro vr̥ṣagiripraṇayī yathā’sau
muktānubhūtimiha dāsyati me mukundaḥ

नातः परं किमपि मे त्वयि नाथनीयं
मातर्दये मयि कुरुष्व तथा प्रसादम् ।
बद्धादरो वृषगिरिप्रणयी यथाऽसौ
मुक्तानुभूतिमिह दास्यति मे मुकुन्दः